RAÍCES
Sultan Bayazid el segundo i los djudios desterados de Espanya
L os mas venturozos delos egzilados, djudios dela Espanya desterados; fueron los ke se avrigaron en Turkia, leshos dela muerte i la tirania.
El gloriozo Sultan Bayazid el segundo, famozo estonses, en todo el mundo; resivio los djudios a plantas de mano, en las tieras del Imperio Otomano.
Sultan Bayazid, se mostro piadozo, mas intelijente, prudente i injenyozo; de todos los prinsipes kristianos, konsernando la vida de nuestros ermanos.
Entendio la valor delos desfortunados, los trezoros ke tenian guadrados; no en sus bulsas ni en sus intestinos, ma en los kashones de sus meoyos finos.
El realizo el provecho bien serio, ke iva ser para su imperio; el progreso i la prosperidad, ke iva rezultar en kada sivdad.
El se burlava dela absurda idea, dela inkezision maldicha i fea; dela reyna, del papas Torkemada, por sus terivle i mala pensada.
Del Rey Ferdinando el se burlava por loke alos djudios desterava; un puevlo intelijente i provechozo, un puevlo fiero i laboriozo.
Sultan Bayazid siempre remarkava i asu korte esto deklarava: “Ferdinando su propio paiz emprovisio i el mio, mas muncho enrikesio.”
Los djudios davan alavasiones i loores a este monarka, por sus favores; derechos i privilidjios les akordava. i kon ojos de piadad los mirava,
el mando un “firman” ofisial, asus provensias Evropeas en djeneral; komandando a todos los governadores, de no ronjar a los resfuidos espanyoles
de resivirlos kon dulsor i afavilidad, darles avrigo, en kualonke sivdad; tratarlos komo sivdadinos pazeguozos, porke bivyeran kontentes i orozos.
Ansi donke, grasias a este soverano, tan bueno, dulse i muy umano; los djudios de Espanya ronjados, empesaron a bivir, dias mijorados
.Miles se estabilisieron en Turkia, formando una grandioza famia; organizandosen en varias komunidades, i despiegando esforsos i aktividades
avrieron eskolas, keilot fondaron, varias institusiones organizaron; en poko tiempo, se vido sukseso, realizando un senyalado progreso.
Los djudios en el Imperio Otomano, izieron un esforso sovre-umano; eyos krearon una Espanya orientala. en sus vida partikulara i nasionala
saliendo dela Espanya de el inferno, avrigados basho un piadozo governo; eyos progresaron, suvieron de grados, ganando postos bastante elevados.
La Espanya de oy, siente regreto, por el terivle “desteramiento,” por la inkezision de maldicha memoria, ke kedo preta en la istoria.
La Espanya de oy, realiza el yero, i lo proklama kon korason sinsero; ke los djudios su paiz emprovisieron, dezde ke en Turkia se establisieron.
La Espanya de oy, tiene fuerte dezeo, de ver a el puevlo ebreo; returnar en su paiz komo antes, i realizar progresos djigantes.
Asta agora numerozas tantativas, seriozas repetadas i bivas; fueron echas por politisianos, por el returno de nuestros ermanos.
El Rey Alfonso, monarka aktualmente, ansi ke “Pulido” senator intelejente; tienen echo yamadas repetadas, a personas sefaradim bien konsideradas.
El Rey Alfonso, ultimamente, deklaro a Senyor “Rozanes” lo sigiente: “es mi dezeo ke los djudios egzilados returnen en mis tieras, bivan repozados.”
“Eyos son fieles, aktivos i zelozos, deven olvidar, los rekordos doloriozos: vinir en Espanya, bivir en pas, sin tener trobles, ni dolores mas.”
Despues de mas de 4 siekolos desterados, los sefaradim, oy somos yamados, pero, la triste i maldicha inkezision, no se puede embarar dela nasion.
Avlamos espanyol, esto konservimos uzos i kostumbres guadremos; pero, lo pasado es inolvidavle, siendo fue un kulpo formidavle.
