RAÍCES
La sensia de madres
Rachel Amado Bortnick
L as mujeres de agora tienen a sus dispozision munchos manaderos para rezolver problemas fizikos o mentales, i tomar informasiones sientifikas de todo jenero. Kuando tenemos problemas vamos a doktores, a psikologos i a psikiatres, i kuando keremos mas informasion, vamos a Internet i bushkamos en Google, i topamos lo ke keremos.
Ma avia un tiempo ke no teniamos estos remedyos. Toda la saviduriya i el konsejo ke teniamos menester, sovre todo mozotros las ijikas, estava en el meoyo de muestras madres - i eyas lo savian de lo ke se embezaron de sus madres - o tias o vizinas.
Ya vos akorash komo, por egzemplo, eyas konosian la fiziolojia del puerpo.
A kriyaturas no se da a bever kafe. Deke? Deke no? No vos akodrash? “Porke si beves kafe, pishas preto!” BArminan ke espanto! El Dio ke no mos trayga!
Kreygo tambien ke muestras madres se ambezaron tambien las leyes de la fuersa gravitasional. (Puede ser ke mezmo eyas la deskuvrieron antes del inglez Isaac Newton, ke la dio a konoser al mundo sientifiko!) Por esto es ke mos dezian ke no es bueno komer en pies. En pies no se kome, kale ke te asentes. Deke? Porke si komes en pies, la komida se va a los piezes. Al pareser es ke para ke pueda kedar en el estomago, kale ke te asentes. Si no, ya savesh: la fuersa gravitasional trava la komida a los piezes.
Avlando por estar en pies: Vos akodrash lo ke les dizian a la persona ke keda en pies, alugar de asentarse komo benadam? Le demandavan “Deke estas en pies, boy es ke keres echar?” No se de ande salyo esta teoria, ke la persona se ennaltese en estando en pies. Es un sujeto ke se deve investigar. Sera posible ke los altos se izieron ansina porke no les agradava asentarsen?
Oh, los piezes. Muy importante para la salud. No savesh ke la yelor entra al puerpo de los piezes? Por esto es ke mos dizian ke deskalsos no se kamina, mezmo en kaza. Te vas a yelar, mezmo si esta kalor. Pishin metete terlikes (o patuklas, komo dizimos en Izmir) para ke no te agas mala!
Ama al pareser ni eyas no estavan sigura si la yelor entra de los piezes - o de la kavesa. Porke tambien, si estava de ayre o frio afuera, no mos deshavan salir sin algun fishu en la kavesa. En este kavzo mos dizian ke la yelor entra al puerpo de la kavesa. Puede ser ke estas dos puntas del puerpo - la kavesa i los piezes - son las mas nazik (delikadas), i kale ke las tengas siempre keyntes para ke no te entre yelor i te agas hazina, leshos de mozotros!
Ah - la boka l’alma! Mos olvidimos de la boka l’alma. Lo mas emportante. Si te echas a la kama, mezmo para repozarte un poko, kale ke te kuvijes (üstünü örtmek) la boka l’alma. Los piezes i la kavesa no emporta en la kama. Solo la boka l’alma! Es de ayi ke te entra la yelor!
No se si estas teorias de muestra madres fueron provadas por los sientifikos. Ma lo ke se es ke todo esto mostrava la kerensia i el kudio ke tenian por mozotros muestras madres djudias. I es grasias a esta kerensia i este kudio ke estamos sanos i rezios oy en dia.
Tomado de la Revista El Amanecer, mayo de 2017
Cortesía de Sima Taranto
